港媽逼讓座被拒後鬧人「冇愛心」 女乘客一句完美KO被讚講得好

讓座問題不時引起連場激辯。有網民日前在巴士上，目擊一名港媽以「小朋友好攰，發緊脾氣」為由，逼一名女乘客讓座，被拒後竟破口大罵對方「冇愛心」，女乘客隨即反駁道：「其實你生仔我無責任㗎！」對此，不少網民認為女乘客講得好，「人哋讓係人情，唔係老奉！」

港媽要求讓座被拒 「點解你咁冇愛心」

該名網民向Facebook專頁「生仔要考牌系列」投稿，指當時巴士內十分多人，該名港媽帶着小朋友搭車。由於沒位坐，該名小朋友不斷發脾氣叫媽媽抱，「阿媽又唔多想咁」。其後，港媽轉而向一名坐着的女乘客要求讓座，「我個小朋友好攰，發緊脾氣，可唔可以讓畀佢坐」，女乘客聽罷禮貌地婉拒，「唔好意思，我都好攰」。然而，港媽仍未「死心」，

港媽：佢發緊脾氣

女乘客：所以？

港媽：點解你咁冇愛心，唔可以就吓人，佢發緊脾氣畀佢坐都唔得嘅，依家啲人真係

女乘客：你咪抱佢囉！讓畀你係人情，唔讓畀你係道理，佢要坐，你咪等下班有位先上或者搭的士

港媽：佢得幾歲咋

女乘客：其實你生仔我冇責任㗎，唔好覺得個世界欠咗你，要人就你啦好冇？

樓主指出，女乘客說完該番話後，港媽未有再回應，但「成程黑晒面」；至於小朋友則繼續要媽媽抱，惟港媽繼續毫不理會。

網民認為港媽做法不妥 「讓係人情唔係老奉」

此事引來網民熱議，不少人認為港媽的做法不妥，女乘客說得沒錯，「其實係需要解釋畀小朋友聽冇位就要企，鍛練吓啫」、「講得好，讓係人情，唔係老奉」、「連自己個仔都唔抱，憑咩要人讓個位畀佢？」、「阿媽唔出聲，行車期間抱唔好，我可能都讓，但咁樣態度出到聲，我堅決唔讓」。

此外，亦有網民表示：「如果我係個女仔，我會主動讓座畀小朋友。如果我係個阿媽，我唔會要求人哋讓座，要小朋友明白有位先有得坐，無位要企係正常。」

撰文：李凱晴