鞏俐主演電影《奪冠》日前於北京舉行首映禮，導演陳可辛嘅另一半吳君如都有到場支持並獲邀在台下發言，但陳可辛就鮮有咁搶住講，仲乘機同吳君如表白：「她說之前，我想先謝謝最重要的一個人，就是你，君如。」
（東星娛樂）
全場即時起哄，陳可辛仲提起當年拍電影《投名狀》嘅時候，佢本來想做「逃兵」，全靠君如佢先捱得過：「她（君如）飛來北京安慰我，叫我堅持下去，而拍這部電影，中間亦有很多矛盾，前幾天她都飛來陪我，解決所有問題，使我有信心，能夠走下去，所以非常謝謝。」
（吳君如IG）
君如聽後索一索鼻，然後表示：「I'm proud of you.」全場掌聲雷動，相當感人！佢指陪住陳可辛就好似坐過山車一樣，講嘅時候一度哽咽，又話一部電影的成功，唔係靠一個人的功勞。
（微博圖片）
現年54歲嘅吳君如同57歲嘅導演老公陳可辛呢段愛情長跑已經跑足廿年有多，二人更加喺13年前生咗囡囡陳是知，不過就一直都冇註冊結婚。佢哋嘅感情仲好過好多老夫老妻，其實陳可辛接受訪問時，透露自己曾經向君如求婚，當時喺最親密嘅家人同朋友見證下單膝下跪，而吳君如亦感動到喊。
（吳君如IG）
不過吳君如認為求婚已經足夠，婚禮同其他繁文縟節都係多餘，唔需要註冊，亦唔需要擺酒。「我覺得愛情係你好喜歡見到呢個人，你每一次見到佢都有一個開心嘅心情。」吳君如豁達嘅愛情觀，非常有型。
（吳君如微博）
吳君如同陳可辛喺工作上亦互相支持，當對方遇到低潮時，都不離不棄。有指陳可辛曾因為投資電影失利而負債，吳君如亦唔介意用自己嘅積蓄幫助對方渡過難關。
（吳君如微博）
吳君如2017年處女執導兼分身演出，特別安排經驗老到嘅陳可辛出任監製一職。佢直言男友幫到佢好多嘢又可以幫佢把關，不過都會有意見分歧繼而嗌大交。不過佢就話拍呢套戲令佢兩個成日都唔喺屋企，搞到阿女鬧情緒，再合作應該會係好耐之後嘅事。
（吳君如微博）
二人嘅寶貝女陳是知眨下眼就已經13歲啦，正直反叛期，君如都話要睇書學教女。
（吳君如IG）
吳君如曾經喺囡囡生日時罕有Post合照，是知同爸爸好似餅印咁，真係冇地址都唔伯寄失呀！唔少網民都大讚Jilian愈大愈靚，仲開始有少女味。
（吳君如IG）
（吳君如IG）
撰文：黃蘊姿