昂坪市集打造節慶花海 熊熊三兄弟同你拜年

農曆新年除咗拜年，當然要同親朋好友玩餐飽。黛安收到風，著名電視卡通《We Bare Bears》熊熊三兄弟由下星期四（16日）起，將換上傳統新年服飾，嚟到昂坪舉行「熊來運到360」主題活動，市集圓形廣場仲會化身成初春花海，兼有We Bare Bears熊運滿堂三大巨型打卡位，充滿新年氣氛。

老大棕熊Grizz手持醒獅喺熊熊花拱門向大家拜年，二哥熊貓Panda同三弟北極熊Ice Bear，就會化身月老同財神，畀大家齊齊喺財「熊」勢大許願井許下新年願望，到時仲可以去桃花樹行個大運。

「與佛同行」到時亦會搖身一變成「熊熊許願館」，設有五大打卡行運位，好似風車陣、天燈陣等，人人大吉大利行大運。如果喺市集同任何「熊熊」合照，可以將相片放上個人社交網站，玩埋新春熊運通天大抽獎，大獎包括iPhone 11、任天堂Switch遊戲機等，展期至2月23日，記住唔好錯過！