賽馬會全港多區辦免費巡演 重現獅子山大笪地情懷

大笪地嘅熱鬧，街坊攤販有說有笑嘅歡樂場景，相信好多人都記得。黛安都好懷念獅子山下守望相助嘅精神，聽公關姊妹講，由香港藝術發展局主辦，賽馬會慈善信託基金捐助嘅「賽馬會藝壇新勢力」，呢個月起就會喺全港多區舉辦28場免費巡演，喺街頭重現當年大笪地嘅情懷。

負責創作同演出嘅綠葉劇團藝術總監兼導演黃俊達話，今次流動劇場以《我哋大家在獅子山下相遇上》為題，結合咗戲劇、真人講故同潛入式觀賞體驗，仲搵咗多位經歷過大笪地風光嘅老街坊參與演出，務求原汁原味講番「老香港」嘅故事。

黃俊達仲話︰「好多香港昔日美好嘅人和事都隨時代被人們淡忘，希望今次演出可令大家再次感受到獅子山精神嘅溫度，劇團都從老街坊身上收集咗好多小故事，充滿點樣處世待人嘅民間智慧㗎。」另外，劇團都特別用咗手推車形式去設計場景，以便巡演時可以喺30分鐘演出內將大笪地嘅補鞋檔、睇相檔、涼果檔等如實搬到街頭，非常有心思。