買迪士尼頭飾配對捐款 助傷健人士願望成真

下個月就係聖誕節，相信每個人心中都有個願望，傷健人士當然都唔例外！為咗支持大家「願望成真」，黛安知道，香港迪士尼下個月將會聯同願望成真基金（香港），一齊推出「米妮星願耳朵」（Minnie Wishmas Ears），只要每購買一個指定頭飾，香港迪士尼都會捐贈50元畀基金，幫助更多有需要嘅病童。

「願望成真基金」受惠者之一嘅大學生Andrew，患有俗稱「玻璃骨」嘅先天性成骨不全症，平日需要用輪椅代步，聽覺亦受一定影響，但係佢一直勇於克服困難及學習障礙，佢同黛安分享，無論係傷殘定健全人士，每個人都會有願望，只要肯堅持，總有機會願望成真，仲話對病童嚟講，簡單如去一次旅行，或者去迪士尼見自己鍾意嘅迪士尼朋友咁，都係一種鼓勵，令佢哋更有動力同勇氣去面對病痛。

另一個受助者、今年4歲嘅澄澄，因為患急性白血病，成日都要出入醫院接受化療，透過基金安排今年4月終於首次到訪香港迪士尼，同心愛嘅公主見面。澄澄媽媽話，當囡囡知道可以去香港迪士尼，即刻變得好有目標同努力接受治療。黛安希望大家多多支持願望成真基金，令基金可以幫更多人！