電車駛入荃灣悅來坊 聖誕車站回顧115年歷史

叮叮叮！一向喺港島行駛嘅電車，原來正準備過海去荃灣啦！黛安聽公關姊妹講，下星期一（25日）起至明年1月2日，The East同悅來坊即將舉辦《電車聖誕展覽》，商場將會幻化成聖誕電車站，車廂仲會搖身變成香港電車時光隧道，一齊回顧電車115年來嘅歷史同回憶。

話明係《電車聖誕展覽》，今次活動就將會展出多款由香港電車及香港收藏家協會主席張順光借出嘅懷舊及現代珍貴展品，好似車票、特色明信片、電車模型、周邊商品等，等大家猶如親歷其境，感受舊香港獨特嘅人情味；而展覽中嘅電車亦將以經典紅色古典電車為藍本，車身再加上閃亮嘅燈飾同聖誕元素，打造成獨一無二嘅古典派對電車，應節又有特色。

黛安仲知道，屆時商場嘅吉祥物小熊貓「悅悅」會粉墨登場，化身成小小導賞員，喺候車站向大家講解香港電車歷史同各款現代電車收藏品嘅典故，可愛又懷舊嘅場景，絕對適合親子聖誕打卡，仲有多場精采嘅聖誕表演同特色工作坊！黛安已經約好屋企人一齊去，大家都唔好錯過啦。