聖誕曲奇義賣 捐款助乳癌化療服務

聖誕節普天同慶，更應該關懷別人。黛安知道，「全球華人乳癌組織聯盟」今年聖誕節會繼續推行曲奇義賣，喺「粉紅天使」聖誕曲奇禮盒裝內，會有一件餅面上繪有傳揚愛心粉紅天使嘅曲奇，以及9件隨意配搭嘅曲奇；而義賣所得扣除必要開支後，將全數支援聯盟提供嘅免費項目「粉紅天使乳癌化療陪診服務」，好有意義啊！

黛安聽「華人乳癌聯盟」主席王天鳳介紹，呢個陪診服務係康復者以過來人身份擔任「粉紅天使」，支援正接受療程而須陪診嘅乳癌患者，等佢哋喺最需要協助個時，可免費獲得支援。

至於「粉紅天使」聖誕曲奇就以全天然及無添加製作，部分仲係由乳癌康復姊妹、其家人及朋友們親手製造！「粉紅天使」聖誕曲奇義賣即日起可訂購，到下個月5日就截止，希望大家今年都繼續多多支持！