牽手特殊需要人士 同行社區藝術表演

黛安一向都鍾意睇展覽同表演，最近聽公關姊妹講，聖雅各福群會復康服務賽馬會啟藝學苑主辦嘅藝術計劃《牽手藝同行2019》，喺今年下旬有好多藝術活動，讓特殊需要人士、不同界別嘅新晉藝術家，用藝術與社區人士對話。

好似由即日起至今個星期四（21日），喺賽馬會創意藝術中心（JCCAC）舉行嘅《D-MEN異人盟》展覽，就可以睇到唔同範疇嘅藝術作品，例如繪畫、藍曬、立體創作和錄像等。另外，仲有復康人士舞團「心飛舞團」喺下個月12日，會公開演出舞蹈劇場《天空‧藍》，佢哋會以舞蹈述說每位特殊需要家長嘅愛與堅持，希望觀眾能透過舞蹈劇場，一同與家長們再走一遍，感受喺藍天所尋獲嘅「異」常快樂！