體驗精采滑冰表演 與迪士尼朋友齊追夢

鍾意睇滑冰滙演嘅朋友要留意喇！黛安收到風，由菲爾德娛樂公司精心製作嘅冰上迪士尼之「來吧！一起追夢！」（Disney On Ice presents Live Your Dreams），會喺香港首度演出，日子係明年2月19日至23日，演出門票明日（20日）起就會公開發售喇！

黛安好有興趣睇《魔海奇緣》，聽公關姊妹講，到時滑冰舞台會幻化成一片壯麗汪洋，大家可以同《魔海奇緣》嘅主角慕安娜（Moana）一齊拯救島嶼！精采嘅視覺效果，真係好似入咗故事世界咁。而舞台製作團隊亦精心打造咗《美女與野獸》嘅奇幻世界，畀大家見證貝兒及魔幻城堡一眾僕人成為摯友，用勇氣走出世俗追尋夢想嘅旅程。

公關姊妹仲話，安娜公主、愛莎女皇、樂佩公主、費林•雷德及灰姑娘，都會上演動態優雅嘅滑冰表演，仲有一眾來自《魔雪奇緣》、《魔髮奇緣》及《仙履奇緣》嘅迪士尼英雄人物。

菲爾德娛樂公司執行副總裁及冰上迪士尼製作人Nicole Feld同黛安講，「來吧！一起追夢！」以一眾最受歡迎嘅迪士尼人物故事，去啟發孩子們發掘心中英雄人物。冰上迪士尼導演Patty Vincent都話，冰上迪士尼滙演中最令人嘆為觀止嘅專業溜冰表演，揮灑自如地演繹出每個迪士尼角色嘅獨特個性，家長同小朋友都可以親身感受到一場奇妙旅程。大家快啲約埋朋友去體驗下呢個奇幻旅程啦。