全球首個「Gundam Run高達跑」 自定創意服飾出賽

「機動戰士高達」原來已陪伴咗我哋40年啦，黛安有好多朋友都係高達迷，聽公關姊妹講，明年1月5號Medialink「羚邦集團」會喺香港科學園舉辦全球首個「Gundam Run高達跑」，大家可以趁機大展身手啦！

大會將賽事分為2公里Fun Run、5公里個人賽同10公里個人計時賽，滿足唔同跑手要求，亦畀大家扮演「地球聯邦軍」同「自護軍」出征，跑出好成績，報名參賽就可獲得選手包1個，內含限定索繩背包、機動戰士T恤等，總值700元。最特別嘅係，比賽歡迎參加者發揮創意自訂比賽服飾同造型參賽，集結最強動力，演繹「機動戰士高達」經典場景！

姊妹話，參加者喺網上報名就可獲得限定精美選手包，活動當日仲有「機動戰士高達」主題基地、攤位遊戲、高達模型、8米闊地球聯邦機動戰士母艦「木馬號」等嘅打卡位，同多款限量精品，包括「地球聯邦軍」同「自護軍」嘅手提和肩孭兩用Tote Bag、大型寄倉袋等。咁豐富，仲唔快啲約埋班好朋友一齊參賽！