香港視覺藝術教育節 啟發親子創作樂趣

新世代唔少家長都會為小朋友報讀唔同嘅興趣班，但身體力行、同孩子共同創作更加重要！黛安知道，下月12日至19日，香港美術教育協會（HKSEA）會喺香港大會堂展覽廳舉行第8屆「香港視覺藝術教育節」視藝展，展出近200件來自國際同本地學生嘅視覺藝術作品，包括繪畫、錄像、裝置、陶藝等多元化創作，內容既豐富亦具啟發性。

除咗有展覽，大會亦特意舉辦咗多場教師、家長講座同親子工作坊，請來多位知名藝術家、教師等同家長探討藝術同設計教育發展方向，為藝術培育方面帶來新想法，更希望透過親子間嘅藝術合作，令雙方體驗藝術樂趣。有興趣嘅家長，記住帶小朋友去睇下啦！