培幼會捐鉛筆活動 為柬埔寨童寫出未來

細個嘅作文題目「我的志願」，好多人都會寫想長大後成為老師、醫生、律師等等，有啲人真係會夢想成真，不過，係一啲發展中國家，當地孩童就未必咁幸福可以追尋夢想。

黛安聽國際培幼會（香港）公關姊妹講，好多柬埔寨女孩都夢想長大後成為一位醫生、護士或者老師，但因為貧窮，佢哋無奈輟學結婚，亦面臨家暴同早孕等威脅，每年全球約有1,200萬名女童被迫結婚，即每3秒就有1人。

為咗幫助呢班女孩，培幼會即日起舉辦第7屆「愛‧女孩」鉛筆捐贈活動，為期1個月至下月10號。大家可以去培幼會網站www.plan.org.hk捐筆，每套20元，或將全新鉛筆送至培幼會辦公室嘅收集箱。另外，只要喺網上捐款100元或以上，英皇珠寶就會同樣捐出相應善款。姊妹仲話，今年活動收集到嘅鉛筆，一部分會送畀柬埔寨兒童，另一部分將透過本地文具店「銀の文房具」派畀本地學童。舊年就收集到超過2.3萬支鉛筆，籌得超過36萬元善款，今年籌得嘅善款會用喺柬埔寨嘅教育同童婚項目，部分善款亦會用喺本港推動保護兒童工作。

國際培幼會總幹事蕭美娟（Kanie）喺9月中曾親身到訪柬埔寨偏遠地區臘塔納基里省探訪兒童，其中18歲嘅貝莉雅，佢媽媽10年前離世，爸爸3年前另娶後，就再無返屋企，遺下佢同3名弟妹同祖父母相依為命，佢同另2名弟妹相繼輟學，以維持一家6口生計，所以好希望大家能為呢班細路，出一分力。