黃金海岸商場南瓜節 大戰神秘蜘蛛王

話咁快又到萬聖節喇！黛安聽公關姊妹講，今年黃金海岸商場會舉行南瓜節，除咗有巨型主題南瓜裝置、市集特色攤檔等，仲有神秘嘅蜘蛛王登場，大家可以約埋朋友一齊去狂歡啊！

黛安知道，黃金海岸商場喺今個月18至31日，打造咗各式各樣嘅趣怪南瓜商場，超級無敵蜘蛛王會出巡爬到5米高嘅巨型南瓜，尋找各路「嘩鬼」。姊妹話，如果「嘩鬼」唔想畀蜘蛛王捉到，就要參加「糖果挑戰過三關」和「黃金搗蛋Trick-or-Treat」，動動腦筋贏取萬聖節糖果，增強力量對抗蜘蛛王。

勇敢又貪玩嘅你，千萬唔好錯過「糖果挑戰過三關」，只要你讀出指定萬聖節主題急口令；再轉入南瓜世界，為南瓜加上搞鬼扮相；然後與任何搗蛋南瓜合照，上傳至fb或IG與朋友分享古怪扮相，完成晒指定任務，就可以將3款萬聖糖果帶返屋企。此外，10月26、27和31日場內都準備咗「黃金搗蛋Trick-or-Treat」，按糖果地圖指示探索黃金海岸商場和酒店指定商戶，喺10多個搗蛋點大玩特玩Trick-or-Treat。而商場嘅餐廳亦會將南瓜入饌，推出以南瓜做主題嘅特色食物，南瓜迷必定大快朵頤！