【兩性關係】人妻論盡另一半難頂惡習 10大惡行呢樣嘢榜上有名

正所謂「相處好同住難」，即使是夫妻在生活上亦難免會有磨擦。有女網民日前在網上討論區以「大家講吓另一半難頂壞習慣」為題發帖，指自己最「頂唔順」另一半「冇手尾」。此帖一出隨即引來大批人妻網民爭相留言，論盡身邊「衰佬」的各種惡習。當中不少惡習爆笑非常，不過亦值得讓各位男士引以為戒！

1. 沒有手尾，「老奉」要老婆幫手收拾或找東西

人妻語錄：

－舊垃圾喺隔離都可以當睇唔到！

－勁冇手尾（開過嘅櫃門、盒蓋唔會關上，唔用嘅燈唔熄.......），不能盡錄。

－冇手尾，製造垃圾，唔會掉，唔會執，食完嘢唔幫手執。

－用個口搵嘢，乜都問問問問問，唔會落手搵。

－明明知啲嘢放邊，都要問咗先。

2. 污糟邋遢

人妻語錄：

－唔沖涼！

－放工返嚟未沖涼就換睡衣，到臨瞓先去沖、但沖完又係着返嗰套污糟睡衣瞓，帶晒啲細菌上牀。

－放工返嚟食完飯就去瞓，我洗晒碗沖埋涼叫佢起身沖涼，就一定話得啦一陣沖，如果我瞓咗佢一定天光起身先沖。

－夜晚唔刷牙瞓覺，噴出來啲口氣惡臭，我10幾年背對佢瞓。

3. 成日打機、睇片

人妻語錄：

－成日掛住打機／睇FB。

－成日機不離手。

－一返屋企就塞住對耳，對住電腦，與世隔絕。

－少爺格，顧住打機，無論打機定睇電話都大大聲。

－一打機就老婆姓咩都唔記得！

－攬住YouTube當老婆！

4. 潔癖／強迫症

人妻語錄：

－喺街接觸過物件後，會用消毒紙巾抹手。

－我件處女座麻鬼煩，間中就潔癖上身，一發現張枱多嘢／啲衫亂就發晒癲鬧神鬧鬼，要全世界一齊執嘢（無論你做緊咩，畀佢煩到唔可以唔做）！

－有強迫症，例如買完外賣返嚟，個外賣袋打死結，我通常一嘢剪開個袋就食得，但我老公每次都堅持要慢慢解開佢先攞出嚟食，最慘係佢連我嗰份都唔畀我剪開佢，要等佢慢慢解開！

5. 「漏氣」，有「拖延症」

人妻語錄：

－講到天花龍鳳但無行動。

－做嘢慢吞吞，唔爽快。永遠食完飯小瞓1個鐘先洗碗，洗碗用一個鐘時間洗（幾樣嘢洗），早上要用1個鐘去廁所。

－食完飯就攤沙發瞓覺，叫佢起身沖涼，次次都話瞓多最後5分鐘。

6. 用廁所用得唔乾淨

人妻語錄：

－佢高又唔烏低刷牙，成個洗手盆周圍都係水，彈到塊鏡都係水漬。

－唔鍾意着拖鞋，沖完涼洗完腳成日唔抹乾就周圍踩有水腳印，洗完頭又唔抹乾，個頭又滴水。

－去完洗手間，唔蓋馬桶蓋，就冲水。冲涼後，唔記得閂熱水爐。

7. 十問九唔應

人妻語錄：

－十問九唔應，佢完全唔覺得自己係無禮貌。

－同佢講嘢遲好多拍都冇回應，一係講嘢「揞揞噚噚」，唔知講乜。

－睇親咩電視睇得勁投入，即使係瞬間看地球都好，同佢講嘢、叫佢、拍佢都唔應，要好大聲「喂！」先聽到。

8. 脾氣差，態度惡劣

人妻語錄：

－超寸又惡死！！！受氣受到一個點！

－少少嘢就黑面。

－少少事就大發脾氣。

－EQ低，唔畀人話得。覺得自己好叻，乜都識，成日認屎認屁。自己做到一半搞唔掂要我執手尾，仲要發晦氣冇禮貌。

9. 「裙腳仔」，依賴媽媽、老婆

人妻語錄：

－大少咩都唔做，食飯都要人裝埋，差在未餵。

－佢啲壞習慣……一句當屋企係住宅式酒店，我就係做Room Service嗰個。

－所有嘢係老婆我解決我做。嘥氣。

－媽咪話……媽咪話……家姐話……

而最後的惡習相信大家都「估佢唔到」，但人妻的「抱怨」卻十分窩心！相信只要有以下的優點，便足以彌補所有缺點：

10. 全部行為都十分「惡頂」

人妻語錄：

－他全部都是缺點，係對我和仔女好是優點，所以頂到咁耐！

夫妻相處之道貴乎互相包容、忍耐及坦誠，希望大家與另一半都能和平相處！

撰文：李凱晴