買樓上車是許多港人的夢想，但如果20歲之齡便要你做「樓奴」又會否願意？年約40歲的劉卓耀（Barry）在年僅20歲時便「被成為」業主，負起供樓重擔，為生活及每月1.7萬元供款致債台高築，幾乎要申請破產，但他選擇不斷拼搏及學習，短短2年成功大翻身，數年後更成為製作公司老闆，生活無憂。
熱愛學習、愛創新的他去年開辦全球首個實境喪屍館，大收旺場下今年再下一城。Barry受訪時形容天下並無不勞而獲之事，自己一路走來亦曾遇上種種挫折；只有透過不斷學習、反思及向前拼搏，才能邁向成功之路。
出生草根的Barry表示，父母以前從事製衣生意，造好衣服後會擺檔賣衫，自己年幼時亦會幫忙。自言「讀書唔成」的他中五畢業後獲電視台聘用，負責音響工作，但短短3個多月已意識到沒前途，毅然決定辭職。
其後他在機緣巧合下轉到一間建材公司負責銷售工作，未料剛轉工父親的製衣廠突然出事，「破產咁滯，仲有好多債要孭」；雪上加霜的是，他發現父親對他疼愛有加，原來早已將所住單位轉為其名下，
「嘩，呢一刻適逢巨變，原來寫咗你個名並唔過癮，供唔嚟嗰下就死。」
當時，Barry一家所住單位月供1.7萬元左右，但其底薪卻只有5,800元，
「咁點？冇㗎，sales多勞多得，惟有硬住頭皮。但一坐低就覺得弊喇，即刻諗起『書到用時方恨少』，全部Catalog英文嚟。最後惟有搵返以前最錫我嘅班主任，再靠自己『刨』，而且亦冇辦法，惟有借錢。嗰時我得兩個選擇，一破產，二死頂，但我諗冇理由20歲就破產，重點係自己又冇份使。」
其後，他足足閉關兩年學習及努力工作，「一個字，係個『學』字，你要咩自己先知。一個人都唔見，零活動。而家唔係冇飯開，而係將會無家可歸，衰啲講句係成家都唔知點算。」最後在幾經磨練下他成功大翻身，26歲時更成公司股東及擁有自己廠房，自此已不愁衣食。
約11年前，29歲的他開始感到工作乏味，加上香港愈來愈少大型基建項目等因素，決定轉戰演藝界開製作公司，負責模特兒管理、籌辦各大演唱會等業務。其後，公司更嘗試做知識產權（IP）代理，Barry經多次遠赴日本吃「閉門羹」，最終經多番思量、改進，終成功奪得有「咸蛋超人」之稱的「奧特曼英雄」（Ultra Heros）港澳台三地的IP總代理。
去年，公司獲日本遊戲公司Capcom授權舉辦《Dead Rising: Reality》（喪屍圍城）實境喪屍館，成功吸引大批市民到場大排長龍，場面虛冚。今年公司再下一城舉辦《Resident Evil 2: Infected Hong Kong》（生化危機2）實境喪屍館，年初跟Capcom相議後同意以拉昆市警察局做背景，讓玩家化身遊戲中男、女主角置身其中，逃離充滿喪屍和感染者的大樓。
對於自己的人生，Barry形容自己在起跑線前便已「跛腳」，他認為世界每一日亦在變，人一出生便需不斷學習。他又寄語年輕人，當遇上困難時，大家應先自我反思，
「你發放幾多，就收返幾多。如果每一日都重複，又點可以有突破？冇可能有不勞而獲，我淨係見到每個成功嘅人都有良好嘅習慣，思維亦千祈唔好停留。諗嘢要高，身段唔使高。」
《Resident Evil 2: Infected Hong Kong》實境體驗館詳情，請參考多利安官網或Facebook。
撰文：李凱晴
攝影：羅灝駿、潘卓忻