劉鳴煒驚嚇現身 海洋公園哈囉喂啟動

10月31日就係萬聖節啦，海洋公園哈囉喂全園祭2019昨進行啟動典禮，今年哈囉喂首次推出鬼域概念，將公園劃分6大鬼域，並將恐怖元素由鬼屋蔓延至全個園區。海洋公園副主席劉鳴煒噚日仲以一個驚嚇造型出現，佢話自8月門票開售以來，優越門票銷售較去年同期升25%！海洋公園行政總裁李繩宗亦話，對今年哈囉喂本地客入場人數樂觀。

萬聖節鬼鬼怪怪當然唔少得啦，今年嘅海洋公園哈囉喂將於下月4日至31日期間嘅10個指定日子舉行，噚日就進行啟動典禮。黛安有幸獲邀到園內率先試玩體驗，今年啲新概念真係唔講得少，相當有睇頭。

海洋公園哈囉喂今年嘅全新玩法，包括全園區每日由下晝5點起，驚嚇程度升級，厲鬼會突破鬼屋界限，喺園區內不同角落游走嚇人。而全園祭期間園內將有6大鬼域，包括香港靈異結界、盂蘭老大街、末日後樂園、血祭黃泉、血獄禁區同通靈異境；當中問米婆同算命師會出來擺檔，橫街窄巷有靈體出沒突襲，甚至連去廁所都可能撞鬼！黛安一向自問幾大膽，都嚇一跳呀。

劉鳴煒噚日就率領一眾嘩鬼披露今年重點項目，佢話優越門票銷售比去年同期升咗25%，企業包場的場次亦較舊年倍增。李繩宗就話，暑假人流跌26%，主要因旅客人數錄跌幅，但公園主打本土市場，對今年哈囉喂本地客入場人數好樂觀咁話。