海港城椅子設計展 睇本地建築師創意

年輕人創意十足，只係欠缺機會表現，黛安知道，九龍倉建築設計資源基金嘅「建築設計實習計劃」今年嚟到第9年，早前喺歷屆27位實習學生中，邀請9位各自設計1款凳，再去到海港城舉辦「九把椅子」設計展，將大家喺海外實習時所見所學，融入設計中，學以致用。

其中香港大學建築系畢業生黃愷敏，喺2014年獲選到英國實習，今次佢就以超強颱風「山竹」為靈感，設計出1款名為「Under the Storm」嘅木製長凳。

公關姊妹話，呢個計劃旨在提升本地建築系碩士畢業生嘅設計水平，會為每名到海外實習嘅學生提供高達35萬元嘅資助，至今實習嘅足迹已遍布丹麥、法國、德國、印度等地。如果想欣賞呢班年輕人嘅作品，即日起至24日海港城海運大廈展覽大堂會有展覽，之後每張凳仲會放喺海港城各處，供遊人觀賞及使用。