「齊清潔 愛家園」多區大清洗 無關政治活動

清潔香港，人人有責。黛安知道「齊清潔愛家園」經常籌組義工，一齊喺全港一啲隱蔽處、行人天橋、隧道等衞生黑點做清洗行動，希望做到全民參與，認真唔話得。

「齊清潔愛家園」發起人楊振耀就話，舊年香港就發現首宗大鼠戊型肝炎傳人個案，數月內已有7人被感染，可見香港嘅衞生環境不容忽視。之前佢哋就清潔咗觀塘、九龍灣等區，發現會有棄置車胎放喺路邊，亦有較多屬於「三不管」地帶嘅斜坡，積聚垃圾同積水，形成蚊患，亦有屋苑後山出現唔少老鼠。

聽楊振耀講，今日（20號）會再次發起民間清潔活動，招募義工去掃街、執垃圾，希望杜絕鼠患，但被唔少人聯想到立法會議員何君堯發起9.21嘅清理連儂牆「清潔日」，甚至有義工以為自己要去幫何君堯清理連儂牆。佢話，清潔活動係好多個月之前已經籌辦，一早揀咗9月20號呢日，兩者完全無關係，亦無涉及任何政治活動。

佢唔想義工擔驚受怕，亦唔希望引起誤會，所以要作出澄清，話義工隊會着綠色tee，只會處理地上垃圾，絕對唔會掂連儂牆或任何政治物件。