躁男嫌病假少當場撕爛假紙 大鬧診所3日後結局大反轉

病人為爭論病假日數而大鬧診所？有診所護士指日前一名男病人不滿醫生所開的病假太少，竟憤而當眾撕爛剛獲發的病假紙；對方要求更改病假日數被拒後，竟威脅「見乜撕乜」、「撕爛成間診所」，但護士堅拒就範，終成功擊退對方。原以為事情告一段落，未料3日後男病人重臨診所，但「霸氣」全消，結局竟然峰迴路轉！

男病人「發爛渣」 將病假紙撕爛

診所護士「珍寶豬」在其Facebook專頁「診所低能奇觀」發文分享，指她當日不厭其煩地向該名男病人解釋「病假紙係由醫生寫嘅，你可以休息幾多日都係由醫生決定」，但對方竟當場「發爛渣」，將病假紙撕開兩邊。

「珍寶豬」見狀後向他指出，補領病假紙需繳付100元行政費，

「你撕爛咗嘅話，我哋醫生唔會就咁寫過張新嘅畀你㗎啦......如果你要醫生寫過張新嘅畀你，內容都會係同頭先你撕爛嘅一樣，醫生亦需要收返你100蚊行政費，我哋呢度有寫明如需補領係要收行政費。」

男病人威脅「見乜撕乜」 3日後「跪底」補錢拎假紙

然而，男病人未有理會她，更威脅要撕爛診所內張貼的告示，「你唔寫過張假紙畀我，我就見乜撕乜呀！我成間診所撕爛佢呀！」由於告示全部「過咗膠」，心中暗笑的「珍寶豬」於是回應「要撕嘅話就隨便啦」，又著對方盡快決定是否補領，「我哋就嚟收工」。

男病人最終拾起地上的病假紙「殘骸」，拋下一句「白痴！我就咁交返去！」便轉身離開。但事件並未就此完結，男病人3日後竟然再次來到診所，

「3日後，佢回來了。

『我想醫生補寫張病假紙畀我』

盛惠100蚊呀，多謝晒！」

網民嘲男病人行為可笑 丟架兼不自量力

此事引來網民熱議，不少人直言男病人的行為可笑，「先生，你係要假病紙吧！不是病假紙啊！」、「面係人地畀！架係自己丟」、「點解要再返去診所話畀人知自己衰左啫」、「做乜咁衰仔返轉頭畀錢買一張？」、「真係以為誰大誰惡誰正確？有晒規矩自己唔跟，又係自己攞架嚟丟！」

另有網民認為該名男病人太過衝動，「做人要有型，係需要付出一定代價。呢位人兄用$100買咗嗰幾分鐘...唔符合經濟效益...」、「好多人發難前，沒有衡量過形勢，四字詞係『不自量力』。」、「咁衝動做咩呢？最後蝕底嘅都係自己。」

撰文：李凱晴