晴報×美心西餅 攜手行善 賣限定包籌集$2萬 捐惜食堂

今年適逢《晴報》8周年，早前《晴報》同美心西餅聯乘推出限定版「早晨晴報」綠茶紅豆包，一連5日反應熱烈，活動圓滿結束。黛安知道，活動推出嘅所有綠茶紅豆包均一掃而空，唔少讀者都表示綠茶紅豆包新鮮美味之餘，更為佢哋帶嚟滿滿正能量。

活動能夠順利進行，當然有賴各位讀者嘅鼎力支持啦。皆因讀者們每買一個限定版「早晨晴報」綠茶紅豆包，《晴報》就會捐助2元畀惜食堂，讓活動份外有意義。《晴報》透過推行「2+2慈善計劃」，希望同時支持本地具熱誠嘅慈善團體，散發正能量之餘，仲可以為改善本地廚餘問題出一分力。

《晴報》今次合共捐出兩萬港元畀惜食堂，而早前《晴報》姊妹就聯同總編輯潘少權先生一同拜訪惜食堂，舉行支票移交儀式。惜食堂亦帶大家參觀咗社區中心及廚房等設施，姊妹見到當日義工們非常齊心預備飯盒，與長者們樂也融融，場面非常窩心。

惜食堂代表亦非常感謝《晴報》致力推動慈善，雙方都非常期望以後能夠再次合作，透過行動為社會樹立榜樣，幫助更多的弱勢社群人士。