賽馬會設款客學院 提升員工專業技能

一邊返工一邊進修，原來一啲都唔難。黛安知道，香港賽馬會成立咗會員款客事務學院，提供款客管理專業文憑及高級證書課程，預計課程每年會有20至30個名額，學費全免，暫時只係畀馬會員工報讀。而學員可以喺工作時間上堂，完成課程後最高可以有資歷架構5級水平，相等於大學學士學位嘅程度。

馬會行政總裁應家柏期望學院成立後能支援會員款客事務部發展，特別為馬會明年開幕嘅跑馬地新會所做好準備，培訓多啲款客業專業人才。

另外，由今日起至8月10日喺跑馬地馬場仲會有「駿步•領前招聘博覽」，提供超過500個職位空缺，包括餐飲服務、廚師、廚務等共120個工種同工作崗位，可以畀求職者即場面試，成功嘅話仲有機會即場獲聘㗎。