8港產小太空人今赴美 接受訓練探索太空

太空世界既神秘又吸引，由萬通保險國際有限公司全力贊助同主辦嘅第21屆「萬通保險小太空人訓練計劃」，今日會有8位小太空人出發去美國展開為期9日嘅「太空探索之旅」，黛安都好羨慕呀！

公關姊妹同黛安講，呢8位小太空人喺接近2,000位參賽者中脫穎而出，佢哋經過多重嚴格選拔先至成功獲選！佢哋今日就會同埋家人一齊啟程去美國阿拉巴馬州亨茨維爾太空訓練營同佛羅里達州嘅美國甘迺迪太空中心。

黛安知道，喺9日嘅行程入面，呢班小太空人可以感受月球漫步嘅滋味，仲有模擬喺太空步出穿梭機機艙外嘅地面控制中心，去執行「太空任務」，而且可以近距離觀看將太空人送上國際太空站嘅穿梭機發射台，同真正嘅太空人會面等等，行程好豐富！唔講唔知，原來「萬通保險小太空人訓練計劃」已經成就咗150位小朋友嘅星空夢想，引發小朋友對探索太空，以及高科技航天知識嘅興趣。