昂坪辦人氣打卡展 全日制學生半價坐纜車

平日返工咁忙，黛安都好耐無去感受下大自然嘅美好風光。最近聽公關姊妹講，昂坪360喺今個暑假會推出全新夏日限定活動「昂坪Chill Cool Summer」，由即日到9月1日會舉行超多活動，而且有唔少優惠！

黛安知道，只要係25歲或以下嘅全日制本地學生，喺活動期間到東涌纜車站或昂坪纜車站售票處，出示香港身份證同全日制學生證正本，就可以用半價買昂坪纜車來回門票，標準車廂同水晶車廂都用得呢個優惠。唔係學生都唔緊要，由即日起至10月13日，可以喺官方網站用7折優惠價，就買到水晶車廂來回纜車門票，不過要喺下午2點半後先用得；又或者喺官網選擇以減100元優惠，訂標準或水晶車廂嚟個360大嶼山文化探索深度遊。

「昂坪Chill Cool Summer」除咗引入韓國人氣拍照館「Instasia」設多個打卡位，又有由法國藝術家Elsa Jean de Dieu以蝴蝶做靈感創作嘅「戀戀花蝶」，仲有同「文青女神」袁澧林及本地藝術師聯手繪製嘅「魚樂無窮」打卡牆等等，想影幾多靚相都得啦。