小學生偷竊港媽狂畀藉口袒護 店員：祝佢以後唔好行差踏錯

俗語有云「小時偷針，大時偷金」，教懂小朋友分辨是非黑白，絕對是父母重要的責任。一名任職售貨員的網民近日在店內發現一名小學生行竊，惟對方否認更稱「會再返嚟畀錢」。其母接獲通知後前來了解事件經過，卻不斷表示「唔係㗎」，一直以各種藉口袒護兒子沒有行竊。對此，店員大感無奈：「祝依個小朋友以後唔好行差踏錯！」

小學生：會再返嚟畀錢

該店員化名「可以由黑變白白嘅港媽」向Facebook群組「西客之道 Hispitality Secret」投稿，指近日在店內發現一名小學生行竊後，遂向對方索取家長電話，惟對方卻稱「我冇佢哋電話號碼」。當店員稱要報警時，小學生竟將貨品「攝曬入件衫入面」後，表示：「我冇偷嘢㗎，我只不過攞咗你啲嘢走，跟著會再返來畀錢。」

港媽死撐兒子沒行竊

店員有見及此，遂堅稱要報警或致電其校處理；小學生聽到後，立即遮擋校服上的校徽。其後，店員看清楚校徽後致電學校老師，期間小學生「靜雞雞」偷偷離開。約1小時後，該名小學生在其母陪同下返回店內；店員將閉路電視片段予其母觀看，但對方竟繼續「死撐」兒子沒有行竊：

「冇理由㗎，我今日畀咗錢佢買嘢，佢有錢點會偷嘢？」

對此，店員無奈指出，其子將貨品放入衣服及褲內，「好簡單一個人買嘢，會唔會攝晒啲嘢喺條褲同件衣服入面離開？」然而，該名母親卻開始不斷找藉口：

「唔係㗎，由細到大都有睇住佢，而且佢唔識同人相處，佢有個xxxx病，學校都知，而佢亦都講咗佢唔知自己做過咩，但佢有錢係身唔會偷竊㗎。」

「唔係㗎，因為我唔知發生咩事，所以我落嚟了解返，但我小朋友真係唔會咁做。」

「唔係㗎，可能佢諗住去完買嘢食，再返來畀錢呢，佢又唔係冇錢？」

「唔係㗎，佢應該想去M記買完嘢，再返來畀錢㗎。」

「唔係㗎，我諗住帶佢過來了解返件事情，跟著同你道歉。」

「唔係㗎，唔係㗎，我信佢唔會做依啲嘢。」

店員：日後真係不敢想像

店員聽罷詢問該名母親，為何有片作證，但仍不斷以藉口來掩飾兒子行為，「你帶個小朋友落嚟要了解件事情，但係咁講唔係㗎、唔係㗎，你覺得幫到個小朋友？」最後，他「講到已經唔想再講」，遂拋下一句「你畀返錢就走啦」來了事，但小朋友一直未有道歉。在文末，他又無奈地稱：

「問心，你落嚟講句對唔住，我就已經算數，但落嚟講到係誤會佢小朋友偷嘢就真係......唔識講。祝依個小朋友以後唔好行差踏錯，而依個媽咪假如繼續咁教個小朋友，日後真係不敢想像！」

網民：唔識教就唔好生

此事引來大批網民熱議，不少人認為該名母親「害死個仔」，亦認為樓主應該報警，「唔識教就唔好生！唔好大教壞細！成年人外表細路仔嘅思想！」、「慈母多敗兒」、「斷正都要死撐，真係好肉酸」、「其實洗乜解釋咁多，佢嘅行為已經係偷嘢，動機原因叫佢同差佬解釋啦，報咗警先」、「呢個家長唔識教細路，等佢上法庭，嚇一嚇佢先會驚」。另有網民認為，鑑於現時有不少怪獸家長，完全不懂「教仔」，「強烈要求政府立法生仔要考牌！」