大叔強索免費膠袋狂罵收銀員 曬英文粗口遭4正義大嬸一句KO

大聲夾惡便可橫行霸道？一名在屋苑麵包店任職收銀員的女網民在網上發帖，指一名大叔早前強索免費膠袋，她拒絕後竟被對方以粗口及英文辱罵。所幸4名排在大叔後面的婦人看不過眼，助她出口反擊大叔，「唔該學好啲英文先好再出街！」最終大叔不敢作聲，只好頭也不回地當場敗走。

大叔態度惡劣 強索免費膠袋

該名化名「小忌廉」的收銀員向Facebook專頁「西客之道 Hispitality Secret」投稿，指某日早上正值人流高峰，一名購買兩個麵包的大叔付款時，她問對方是否需要分開兩個膠袋包裝，卻遭對方無禮回應︰「問咩X嘢呀？兩個麵包就梗係唔使分開包啦，仲要問。」

她起初以為大叔只是態度較差，遂當無事發生。未料，大叔隨後著她另取一盒室溫牛奶，並要求免費索取膠袋；她依政府法例要求收取5毫膠袋稅後，對方竟隨即發難：

大叔：你咩X嘢態度？I'm a customer（我是顧客），你只係收銀員就應該按我要求去做，我理得你咩法例唔法例！

小忌廉：叔叔，唔好意思呀，我真係唔可以亂俾膠袋㗎……

大叔：You're crazy bxxch（你是個瘋婦），你諗清楚呀，I'm a customer，你以為妳可以隻手遮天？以為你自己係專黨掌權人？Who are you？You're nothing，bxxch！（你是誰？你甚麼都不是，X婆！）

4婦見義勇為 幫收銀員出口反擊

大叔隨後對小忌廉不斷肆意辱罵，4名排在大叔後面的婦人看不過眼，決定拔刀相助，

正義姨姨No.1：你鬧收銀妹妹做咩呀？佢按照法例做嘢有咩唔啱呀？要怪就怪你自己冇常識兼見識少，連立咗法成十年嘅膠袋法例都唔識，鬧咩鬧呀？仲有，唔該學好啲英文先好再出街，扮勁都要有本錢！

正義姨姨No.2：你以為識英文就代表高尚啲可以唔講道理呀？識講粗口就以為兇到人哋呀？唔該你自己反省下，真心睇你唔起！阿妹做得好唔使驚佢㗎，呢啲人由得佢鬧，幾十歲嘅男人一啲風度都冇，成個潑婦咁！

正義姨姨No.3：學人講咩英文呀？仲講得咁鬼核突，好心你啦，一啲都唔知醜㗎，咁大個男人係度恰細路女！阿妹妳寫底我哋電話，有咩事我哋班姨姨幫妳做證！

正義姨姨No.4：香港人就係畀你呢啲人陀衰晒，識兩句英文就以為自己了不起，今日你就係畀你自己嘅英文搞到出晒醜，把口賤個格又衰，真係唔鬧你都對唔住自己！幾十歲都唔識尊重人哋，消費者好叻咩？老人家大晒呀？阿妹畀膠袋你會罰$2,000㗎，你自己要死就算，唔好累埋人哋！

大叔唔敢出聲 頭也不回敗走收場

最終，大叔被4名婦人反擊得體無完膚，最後「一粒聲都唔敢出」兼「頭也不回」地離開。對此，小忌廉十分感激4名婦人拔刀相助，「如果呢幾位正義嘅姨姨睇到呢個post，小妹小忌廉在此再三感謝你哋，並衷心地祝願你哋永遠漂亮健康快樂，一切很美只因有你（哋）！」

網民大讚4名婦人：睇完好感動

此事引來網民熱議，不少人紛留言大讚4名婦人見義勇為，「睇完好感動，同一時間有4個正義人士出聲幫手，如果嗰刻係我，我一定會眼泛淚光」、「有時候有啲明事理嘅客人肯出聲，真係好窩心」、「真係好難得有咁多客人肯為你出聲」、「我哋做客時要挺身而出呀！」