「心經簡林」增二維碼 掃一掃認識歷史

大嶼山「心經簡林」唔少人都去過，咁好嘅地方，當然值得一去再去啦。黛安知道，「心經簡林」最近完成設置改善工程，包括新增咗已故嘅著名國學大師饒宗頤教授生平紀念牌、仲有平面指示圖同休息座椅，仲增設埋二維條碼，大家用手機掃一掃，就可以連接旅遊事務署更新咗嘅「心經簡林」網頁，了解到景點嘅歷史同背景。

「心經簡林」係饒宗頤教授喺2002年，將自己嘅《心經》墨寶蒐贈畀香港，並讓墨寶轉化做大型雕刻，豎立喺大嶼山鳳凰山山麓嘅天然山坡上。成個「心經簡林」由外觀古樸嘅木樁組成，依照自然山勢排列，同大自然融為一體，形成一個獨一無二嘅大型戶外藝術作品。

旅遊事務署發言人話，好多謝香港大學饒宗頤學術館以及饒學研究基金，慷慨提供饒教授「心經簡林」親筆題詞同「鳳過荷塘」畫作，有關作品刻劃於新增嘅饒教授生平紀念牌同「心經簡林」平面指示圖上。黛安已約好姊妹再去參觀順便洗滌下心靈，大家都一齊去睇下啦！