挪亞方舟互動體驗 小朋友親嘗夢想職業

下個月就係小朋友夢寐以求嘅悠長暑假，趁機玩餐飽輕鬆下之餘，不妨試下搶先「投入社會」體驗打工滋味。黛安知道，由下月13號至9月1號，挪亞方舟逢星期六、日及公眾假期，將會推出糅合玩樂、教育及啟發元素嘅「快樂夢想特工隊」，等小朋友有機會試下做7大夢想職業，體驗箇中樂趣，仲可以從中培養智慧、仁愛、公義等美德！

黛安聽公關姊妹講，7大夢想職業包括牙醫、飛機師、消防員同小廚神等，仲會有埋互動體驗形式學嘢，好似做小小消防員就可以勇闖模擬火警現場嘅煙霧體驗區，合力拯救由家長扮演、身陷火場嘅災民，等小朋友可以增強勇氣同團隊精神。至於做小小飛機師則可置身於駕駛艙場景，手執先進嘅模擬駕駛器，翱翔天際，齊齊學習飛行知識，相信成個體驗有助提升佢地嘅解難能力同邏輯思維。

此外，全港首個以大自然為主題嘅光影互動展館「e-Planet夢想星球」，7月都會登陸挪亞方舟，當中分為森林、海洋、四季同未來城市4個展區，打卡之餘亦可傳遞愛護地球嘅重要信息。