海賊王登陸海洋公園夏水戰 齊齊同路飛去冒險

就嚟暑假啦，大家準備好節目未？黛安有好介紹，海洋公園今個夏天同日本人氣動漫海賊王合作，由7月13日至9月1日舉行「海洋公園夏水戰」！

海洋公園首次將海濱樂園廣場打造成濕身專區，重現多個海賊王經典場景，齊齊同主角路飛展開盛夏冒險之旅！

公關姊妹同黛安講，海洋公園夏水戰有7個海賊王景點同濕身專區，包括停泊喺夢幻水都人工湖畔嘅烈陽號、一張張海賊通緝令同巨型路飛草帽等經典場景打卡位，大家可以拎起水槍同草帽小子一齊勇闖海軍大本營嘅水炮機關！小朋友又可以喺威威天地嘅海賊王玩水專區同泡泡派對，玩草帽噴水拱門、超級大水簾同噴泉迷陣等玩水設施，展開連場水槍大戰，沿途多個打卡景點，可同家人影張海盜全家福留念！

喺海洋公園嵐灣茶座仲可享用期間限定嘅「海賊王航海歷險仲夏大餐」，主菜有「芬奇轟拳」同「我要成為海盜王！！」揀，前者以燴海鮮番茄意大利飯，造成芬奇猛烈飛拳所留下嘅深坑，後者就用炸薯蓉炮製，蓋喺紅酒燴牛面頰上，造成路飛草帽；甜品「緝拿路飛」就印有路飛通緝令嘅牛油曲奇配竹炭朱古力慕絲蛋糕。

黛安仲知道，全港首個虛擬實境跳樓機「極速之旅-VR太空探索」亦會喺夏天登場，戴上虛擬實境裝置坐上跳樓機模擬太空飛行體驗。

海洋公園管理及演藝節目執行總監吳守堅話，今年海洋公園夏水戰特別同海賊王合作，主打海盜之間嘅友情同海軍嘅精采激戰，希望大家可度過一個熱血、充滿夢想嘅盛夏。黛安已約咗班姊妹一齊去，大家唔好錯過！