【逃犯條例】向市民道歉未提撤回修例 林鄭月娥記者會全文

《逃犯條例》修訂強行闖關觸發連場大規模遊行及示威活動，其中「612」的示威行動更爆發警民流血衝突，致多人受傷。特首林鄭月娥今日下午4時在政府總部召開記者會，並在會上向香港市民道歉，但仍然未有正面回應會否撤回《逃犯條例》修訂的質詢。

以下是林鄭月娥在記者會上的發言全文：

經過連續2個周日嘅大型遊行，市民透過和平、理性方式，表達對修訂《逃犯條例》嘅憂慮，表達對政府、特別係我個人嘅不滿同埋失望，我都一一聽到，亦有認真嘅反思，同埋反省。過去幾個月嘅爭議，係由於特區政府處理修例工作嘅不足，我個人需要為此負上好大嘅責任。呢件事引起社會矛盾、紛爭，同埋焦慮，我喺呢到向每一位香港市民真誠道歉。

對於參與遊行集會嘅市民、維持治安嘅警隊同事，同埋採訪嘅記者喺衝突中受傷，我感到十分難過。過去多次遊行，我見到好多熱愛香港嘅市民，行咗幾個鐘，希望政府聽吓佢哋嘅聲音。有爸爸、媽媽為咗佢哋嘅下一代走出嚟，有一向沉默嘅市民、亦有青年人覺得要出嚟表達意見。

我明白市民嘅感受，我特別想同參與和平集會遊行嘅年輕人講，我知道你哋希望你哋嘅特首，係一個懂得聆聽、尊重、關心年輕人嘅特首。事實上，與青年同行係我參選行政長官嘅承諾，我深信你哋同我一樣，期盼香港係一個仁愛、有良好管治、有希望嘅社會。我好明白你哋對於社會問題會有唔同嘅諗法，我知道，我哋大家對於香港嘅未來都係充滿熱誠。

今次事件令我知道，我要做得更好。各位，喺我公僕生涯裏面，我一直盡心盡力服務市民。但係呢一次令我更深切明白，作為特首，我要更加努力平衡社會唔同嘅意見，了解市民嘅想法同感受。我衷心希望香港經歷過呢次事件，受傷嘅人能夠盡快康復，社會嘅裂痕能夠盡快修補。因為香港係我哋大家嘅，只有同心同行先至可以為香港帶嚟希望。

圖片來源：香港電台截圖