《逃犯條例》修訂強行闖關觸發「612」示威行動,當日更爆發警民流血衝突,多達79人受傷入院。由於事件中被捕的11人中,最少5人是在公立醫院求診時被捕,醫管局因而被質疑是向警方「洩密」,受傷市民延醫治理或會有所顧慮。有公院醫生就指出,有示威人士被打至大小便出血都不敢求醫,勸籲傷者切勿猶豫應立即求醫,並呼籲醫護勿忘救人天職,保護病人私隱。
對於大眾對醫管局「洩密」的質疑,杏林覺醒成員、心臟專科醫生黃任匡今日在Facebook發文,認為醫管局昨晚發聲明否認是在「耍太極」,但他認為始終救人要緊,「我明呢一刻大家都好嬲。有人話想去headquater示威、有人話想要罷工、有人話要醫管局問責、甚至有人話想要乘機解散醫管局。我明,我真係明。但係救人要緊。喺呢一刻,保護傷者係最首要嘅任務,其他都係次要。」
「有個仔畀人打完大小便出血都唔敢去睇醫生呀痴線!」他指出,由於擔心私隱外洩,因此有示威者受傷後不敢求醫。為此,他提出3個溫馨提示:
1. 如受傷入院求醫,請只向我地提供必須嘅資料,如傷勢、受傷過程等;
2. 至於當時你嘅所在地、出現喺現場嘅理由、以至閣下嘅角色為何等等,臨床上,呢啲絕對唔係必要嘅資訊;
3. That being said,如果係嚴重受傷,請你唔好猶豫,立刻求醫。因為盧偉聰係呃你嘅:催淚炮,布袋彈,橡膠子彈,水炮車等,通通都係 potentially lethal weapon (可致命武器)。會死人㗎!
此外,他又勸籲同袍勿忘救人天職,並向前線同事提出3個溫馨提示:
1. 求大家緊守崗位,唔好罷工。如果我地走左,情況肯定更糟;
2. 提高警覺,喺工作間隨時留意有冇唔係醫護嘅人,靜雞雞攪我地部電腦;
3. 總之盡我地所能,保護病人。切記,保護病人私隱,係最重要嘅專業操守之一。
最後,黃醫生又以hashtag形式給予提示:
#話時話傷者可能有時會因為受驚而記錯意外細節㗎
#我地可能要細心啲幫幫病人回憶
#華陀託夢教我可以咁講
#邊有咁多胡椒噴霧吖一定係你自己整胡椒炒蟹果時唔小心彈左入眼啫
#我估你唔係中橡膠子彈一定係樓下有個靚仔玩氣鎗唔小心射中你
#另外你最近都冇去過金鐘
#一定係咁啫
#哈姆太朗(郎)你話係咪呀?