港鐵商場引入專業模擬器 體驗逼真賽車快感

賽車活動緊張刺激，不論大小朋友都好鍾意。黛安收到風，知道今個暑假港鐵商場旗下德福廣場、青衣城和PopCorn，會引入24部專業級「超逼真」賽車模擬器，等大家可以真實感受賽車嘅快感！

公關姊妹話，賽車模擬器係由本地專業賽車手研發，主要為專業車手提供訓練，模擬器會喺今個月29號至8月25號期間，喺指定商場畀大家試玩。車迷如想跟同場其他車手一較高下？當然無問題啦。姊妹話，市民可以參加大灣區電競賽車大賽，勝出嘅32強可以參加賽車訓練課程，學習專業級賽車手理論，成為香港站車手代表香港出戰大灣區比賽，成為真正專業賽車手！

德福廣場喺下個月6號同7號，特定時段舉辦獨家專業賽車全方位體驗活動，有興趣嘅賽車手即日起可喺https://forms.gle/GiHfo8Fd8gsiY3gH6登記，優先試堂，名額有限啊，想參加就要快啲報名啦。

另外，商場仲會有STEM賽車主題工作坊，畀小朋友親自動手製作賽車，過程中可以學習科學原理，以及一些機械結構工程知識，加深對賽車嘅理解，完成後可以喺賽車模擬器上體驗真實賽車，啟發成為小車手嘅潛能。