嘗美食美酒兼祈願 玩轉日本夏祭

香港人咁愛日本，嚟到夏天當然都要參與夏祭！黛安知道，淺水灣the pulse商場一連兩個周末舉辦「the pulse夏日燈籠祭」，場內布滿燈籠「提燈」布置、燈籠隧道、燈籠許願池等打卡熱點，仲有日本人氣和服店「京都愛和服」直送多款男、女及小童大熱浴衣款式，免費為參加者變身；更有唔少攤位遊戲等，一於齊齊同閨蜜、情人着上浴衣，玩餐飽！

黛安知道，「the pulse夏日燈籠祭」喺剛過去嘅周末舉行，場面相當熱鬧，多款日本直送地道小吃、甜點，好似有80多年歷史，專賣忌廉麵包嘅廣島八天堂忌廉麵包店、日本五大啤酒企業之一嘅Orion等，仲帶來海鹽口同山莓等夏日口味啤酒，夠晒清爽！美食、美酒，加埋現場由一排排祈福燈籠組成嘅燈籠隧道，點點燈光，夠晒氣氛！有興趣嘅朋友，下星期六日記住嚟淺水灣the pulse，邊玩邊吃、邊祈福許願，免費入場㗎！