中環WMA Space環保展 認識海洋廢物 了解生態系統

近年大眾環保意識提高咗唔少，但其實要學習嘅嘢仲有好多。黛安知道，繼2016年後，墨西哥藝術研究團體TRES將再度訪港，今個月尾就會喺中環嘅WMA Space舉辦「無所不在」關於香港垃圾嘅期間限定展覽。

據黛安了解，TRES早前利用藝術為研究基礎，一邊探訪垃圾灣周圍實地考察，一邊收集各式各樣嘅海洋廢物，仲編織出一系列嘅海洋廢物關係網絡，從而辨認出物件之間、甚至同其他非人類媒介嘅關聯，好似寄居喺塑料上嘅微生苔蘚蟲等，用作研究塑膠廢物同海洋微生物嘅結合，務求從另一個角度發掘佢哋同生態系統嘅關係，相當有意思。

而收集返嚟嘅「寶藏」，仲會被製作成藝術品，並將會喺「無所不在」期間限定展內展出。有興趣嘅朋友，記住今個月25至30號，去中環WMA Space睇展覽喇！