玩具節周五開鑼 多款模型首度登場

一年一度玩具節又嚟啦！黛安知道將喺今個星期五（14號）於會展開鑼，雲集港日知名玩具參展商，包括全港首賣嘅TOMICA KMB訓練巴士，門票只需30元，玩具迷唔好錯過！

今年值得先睹為快嘅，一定係超大型TOMICA x PLARAIL「立體情景模型」、全港首度曝光嘅索斯機械獸「覺醒狂野白獅」和「尖牙猛虎」，以及6大爆旋陀螺3D模型同期展出。聽公關姊妹講，全港首賣嘅TOMYTEC MAZDA RX-7 Type RS-R 1997、TOMICA米芝蓮貨櫃車和豐田日本的士，會喺今個星期六（15號）首賣，會場亦會優先發售《黑紅版帝皇鮫鯊.4G.Hn'》同《限定色版天弓力士.10C.A'》爆旋陀螺等產品，勢必掀起搶購潮！

另外，九巴首次參加玩具節，仲會首推兩部1︰76九巴平治O305巴士，更展出大型Q版巴士模型畀車迷拍照；同時有Disney Motors 10周年紀念展覽區，首度展出插畫展，內有別開生面嘅主題擺設。黛安已經約咗屋企人一齊去搜羅精品啦！