疑自閉症男童港鐵咬手飲泣 附近港媽們即彈開：佢痴線㗎

無知家長亂教子女十分可怕！有網民日前在港鐵上目睹既驚人又心酸的一幕，一名疑患有自閉症的男童不斷咬手、飲泣，四周其他媽媽級乘客見狀後竟即散開，其中更有人向子女表示「佢痴線㗎」，叫他們不要走近。對此，該名網民大為心痛，不禁反問：「媽媽們咁樣教小朋友真係啱咩？」

男童不斷咬手飲泣

該名網民向Facebook專頁「生仔要考牌系列」投稿，指日前在放學時間搭地鐵，看到有工人姐姐拖住一名疑患有自閉症、年約10歲的男童，「個男仔似乎唔開心，不斷咬自己隻手，忍住唔敢大叫，但是都有啲飲泣聲，姐姐就不斷叫佢 calm down（冷靜）。」

港媽們叫子女走開：佢痴線㗎

未料，在擠迫的車廂內，其他乘客開始走開，

走都算，有幾個媽媽仲要好大聲同自己嘅仔女講：「佢肯定痴線㗎，唔好行埋去！」

其中一個幾歲大嘅小朋友問：「咩係痴線？」

個媽媽仲要話：「佢一陣就會來打你㗎啦！」

然後幾歲大嘅小朋友即刻好驚走開……

網民見狀後大感心酸，不禁表示：「我唔係咩聖人，但是眼見喊緊果個男仔只是喊 & 咬自己個手，無傷害任何人，媽媽們咁樣教小朋友真係啱咩？」

網民大罵港媽們無知

此事引來網民熱議，不少人紛留言大罵該些媽媽十分無知，而且亦無同理心，「無知好可怕」、「無知扮有知識仲可怕」、「無知仲弊過痴線」、「人地可能有情緒病，但佢已經控制緊自己，有必要踩一腳嗎？」、「已經唔係要求你幫忙、包容、接納呢類小朋友...但實在冇必要落井下石」。

另有網民直斥該些媽媽亂教子女，「佢可以拉開個仔，但係唔可以喺唔知情嘅情況下亂講嘢」、「護子係啱，但唔應該當面講，好hurt的」、「作為人都要去由幼稚園開始學起咩叫尊重同禮貌」、「保護係要，但灌輸不正確認知係不可取嘅方法，小朋友唔識明辨是非，只識做copycat，誤導嘅影響可以好大！」