欣賞香港龍舟大賽 兼玩潮流創意市集

端午節除咗食糭，當然要睇龍舟比賽啦，黛安聽公關姊妹講，今年嘅香港國際龍舟邀請賽有近5,000位選手、共180支龍舟隊伍參加，分別來自16個國家同地區，喺維港較量，當中仲包括首次參賽嘅獲獎亞運代表隊。為慶祝國慶70周年，今年更會新增國慶紀念杯，另會舉行模仿大賽，選手可以奇裝異服喺海上激戰，爭奪特色造型大獎。

水上鬥得激烈，地上同樣精采。黛安知道，今年嘅龍舟嘉年華首創「港市集‧港故事」潮創手作市集，設有46個攤位，展示過百款本土特色手作精品，包括傳統糖畫、本地刺繡飾物等，仲有懷舊畫風嘅文具同日用品，而且有免費手作工作坊畀大家參加。

大家玩完要「醫肚」，今年嘉年華將新增街頭美食盛會，16個美食攤位呈獻各地美食，包括米芝蓮推介「天天海南雞飯」、天然椰子甜品，另有6輛美食車到場，現場仲有租用餐具、廚餘回收、斟水站同大型回收箱設施，大家可以一齊減廢。聽講嘉年華今年會繼續有人造沙灘、水戰區同黃昏音樂會，並會繼續舉辦陸上龍舟慈善活動，每划行一公里，大會就贊助2,000港元畀香港展能藝術會，整個嘉年華將於6月14日至16日舉行，有興趣嘅朋友記得留意！