「紅鼻子」小丑巡遊 宣傳合家歡表演劇

紅鼻子象徵住大人細路都鍾意嘅小丑，黛安知道，今日就係英國極具特色嘅慈善籌款節日紅鼻子日（Red Nose Day），為咗推廣呢個重要日子，小丑王Ken Ken上星期日特別率領逾百個小丑，齊集尖沙咀文化中心露天廣場，進行咗一個小丑大巡遊，向公眾大派4,000個「紅鼻子」，兼宣傳嚟緊公演嘅「小丑玩轉實驗室」表演劇場，期間仲同大家玩得好開心！

巡遊活動當日，過百小丑喺25架特大「紅鼻子」寶馬車隊護送下，環繞尖沙咀、彌敦道、長沙灣道、荔枝角大巡遊，仲透露7月26日（周五）起會有一個合家歡「小丑玩轉實驗室」表演劇，當中齊集科學、夜光、雜耍、木偶同小丑等5大元素，創造一個既瘋狂又夢幻嘅科學實驗室，絕對老少咸宜，同黛安一樣鍾意小丑嘅你哋記住唔好錯過！