南區驗眼計劃 50歲起免費check

政府之前透過「社區重點項目計劃」，向全港18區，區區預留1億元撥款，其中南區區議會就推展咗「眼科檢查計劃」，噚日仲喺香港仔華貴邨華貴社區中心舉行咗開展禮，好熱鬧啊！

今次計劃喺今日開始，向50歲或以上嘅南區居民，提供一次性免費眼科檢查服務。黛安聽南區姊妹講，50歲或以上人口，佔南區總人口27萬嘅40%，而且白內障、青光眼、黃斑點疾病同糖尿上眼都係常見眼疾，今次區議會已獲計劃撥出4,970萬元，同港大醫學院眼科學系合作，推出為期5年嘅「眼科檢查計劃」，料可惠及2.5萬名南區居民。

噚日民政事務局局長劉江華都有出席，特別多謝南區區議會、社區人士同港大對社區重點項目嘅支持。