內地海外實習計劃 領展5名額100人爭

內地發展機會處處，黛安知道港府透過青年發展委員會，今年同18間企業合作推出「企業內地與海外暑期實習計劃」，領展係其中之一，名額得5個，收到近百宗求職申請，機會難逢，簡直爭崩頭。

聽公關姊妹講，領展以約1萬元月薪，「包食包住」設5個名額，招聘本地大學生到廣州旗下商場實習6至8個星期，增廣見聞。依家喺科大市場學系就讀3年級嘅鄧浩威（Ivan），舊年就獲聘做領展暑期實習生，其中4星期就去到廣州荔灣區「西城都薈廣場」工作，學習內地管理同營運商場模式。

聽佢講，當地嘅手機App發展比香港成熟，商場店舖好多都用電子支付取代現金付款，又會用App同二維碼推廣、以至排隊取籌號等，覺得香港商場其實都可以借鏡。Ivan完成實習後，仲獲領展續聘做兼職員工，領展領導力及人才發展主管許翠芬仲應承佢，之後會請Ivan做長工𠻹！

許翠芬話，新一代人人手機不離手，計劃除咗畀實習生從中學習新技能外，亦都有助顧客利用App選看購物資訊，今年公司就要求實習生設計手機App，推廣商場業務，寓學習於工作。