旅發局夥Google 推介本地優質商戶

中美貿易戰升級，對香港旅遊業都有一定影響。

黛安同剛喺4月履新嘅旅發局主席彭耀佳博士食飯，佢話環球經濟下行壓力可能令旅客外遊次數減少，所以面對呢個危機，本港旅遊業都要提升服務質素，令香港成為外國旅客外遊首選地。

至於有咩「撒手鐧」，原來就係「笑容」，希望服務業界以至香港人，以笑容待客；而旅發局亦將同Google合作，推介本港逾萬間「優質旅遊服務」商戶，協助訪港旅客選取優質服務。

彭博士話，全球經濟差，可能影響民眾外遊意慾，但唔會減至零，可能係以前一年出遊4至5次，減到2至3次，所以要令旅客來港旅遊時，有賓至如歸嘅感覺，笑容同禮貌就相當重要，「笑容唔使花錢，講句多謝、唔該，旅客或者會畀更多貼士，大家雙贏！」

旅發局總幹事劉鎮漢又透露，旅發局會與Google合作，推出多個與旅遊相關嘅應用程式同功能，包括Google Map（在地導航）、Google Posts（新聞資訊）、Google Events（活動信息）及Google Trips and Destination（行程規劃）等，為旅客提供全方位旅遊資訊；另Google Map亦會提供「優質旅遊服務」（Quality Tourism Services，簡稱QTS）計劃認證商戶資訊，預計年內推出。