辦工作坊兼獎勵減廢顧客 AEON同你齊「絕膠」

黛安細細個已經係環保先鋒，外出除咗自備環保袋，仲會帶埋食物盒和保溫袋裝熟食同雪糕。唔講唔知，原來綠領行動今年3至4月調查發現，香港人每星期丟棄超過4,640萬件即棄塑膠，當中即棄膠袋問題最嚴重。

黛安聽公關姊妹講，原來由即日起至今年9月，AEON聯同綠領行動舉行咗一個購物「絕膠」大行動。綠領行動會派員到AEON旗下11間綜合百貨店同超市，舉辦一系列推廣活動，包括4場減塑教育工作坊。活動亦都鼓勵AEON超市內嘅食肆做「絕膠」商戶，即係唔會主動向顧客派發即棄塑膠。而「絕膠」大使每月更會平均3次喺綜合百貨店及超市出巡，獎勵自攜環保袋及器皿購物嘅顧客。

今次兩個機構都好用心推行「絕膠」行動，好似AEON就特意設計咗購物「慳膠四寶」，分別係「環保袋爸爸」、「蔬果袋媽媽」、「為食俠」同埋「保溫妹」，希望用呢4位可愛卡通人物，鼓勵大家喺AEON買嘢時，記得自備環保袋、保溫袋及可重用器皿盛載貨品，逐步改變以前常用膠袋、平口袋同即棄食物容器嘅壞習慣。

有咁可愛嘅環保卡通人物陪大家一齊減塑，大家都支持啦！