無攞籌強行入座唔肯走 惡客：投訴到你哋全部無得撈

光顧受歡迎的餐廳食肆，排隊等位可謂難免，惟不守規矩的食客卻大有人在。一位女網民於酒樓用膳時就巧遇離奇食客，未經取籌排隊就自行揾位就座，被侍應揭發後更惡人先告狀，揚言要投訴至總公司開除相關員工，幸得霸氣經理出面，一句「唔識守規矩既人無資格係度食飯」將劣客「KO」，博得網民無數掌聲。

無視排隊自行入座 劣客惡人先告狀

有女網民於Facbook群組「西客之道 Hispitality Secret」投稿，稱日前至某酒樓打邊爐時遇上奇人奇事。事主指該酒樓一向受食客歡迎，坐位經常爆滿，難免要領取號碼紙等位，惟她發現鄰座一枱食客似乎未經帶位就自行入座，並且若無其事地向侍應索取菜單，稱「點嘢食張單畀張我地睇下先，一陣再落（單）」。

由於酒樓會在人客入座同時派發菜單，該客人未有菜單在手當然會令人起疑。惟當侍應向客人索取菜單與候位號碼飛時，對方卻先聲奪人指：

食客：我張飛一早畀你地收咗喇，你哋收咗又唔畀單我仲要多嘢問？
侍應：我哋唔會收你飛，而且一定會畀單你。你等等先我問下門口（指其他點員）。

好言相勸無動於衷 發難稱「投訴到你哋全部無得撈」

侍應向其他店員查詢有否帶該食客入座，幾分鐘後再向該枱食客查詢指「門口無人帶過你入黎喎，你張飛咩number？睇下有冇聽錯咗」。事主稱侍應有此一言明顯是給予打尖食客下台階，好讓對方識相離開。惟該枱食客卻態度強硬，堅稱「入咗黎坐低就係㗎喇」拒絕離座。事件其後驚動酒樓經理，對方了解事件後確定食客未有排隊，故客氣地要求對方離座。此時食客終於老羞成怒，怒稱：

「我哋係唔走㗎喇，我要投訴你，投訴到你總公司，投訴到你哋全部無得撈！」

霸氣經理出招一句「KO」

雖然祭出「投訴到總公司」一招，但事主稱該位經理依然不為所動，甚至當著其他食客面前大聲指：

「全部樓面嘅人同我聽住，無我吩咐，無人可以幫呢枱客落單，斟茶都唔可以。唔識守規矩既人無資格喺度食飯！」

經此一喝，事主稱該食客頓時為之「嚇窒」，酒樓其他員工亦聽從經理吩咐對該食客「零服務」。經十數分鐘呆坐，事主稱該食客終於自討沒趣識相離開。事主亦稱近幾日依然見到涉事侍應及經理於該間酒樓上班，似乎未因被食客「投訴到總公司」而離職。

網民留言稱經理秉公辦事值得一讚，稱「經理型到喊」、「佢公司管理唔錯，幫襯得過」、「真係要為呢個經理鼓掌」。有人批評部分顧客自以為「顧客至上」，惟員工則因怕收投訴而處處退讓，令劣客變本加厲，「有啲嘢唔好怕煩，你一弱，劣客就會變本加厲，到時處於下風，邊個都幫唔到」。