【感動人心】公公談及生死指自己老邁 孫女不捨大哭：你唔好死呀

假若遇上至親離去，當中的傷痛相信是令人難以承受。網上近日熱傳一張照片，內容為外公帶年幼孫女搭輕鐵期間，路經屯門青松站時看到拜山人潮，因而談及生死話題。當外公指自己年紀老邁，會在不久的將來乘鶴西去後，孫女當場傷心得大哭：「公公，你唔好死呀！」對此，不少網民指出雖是「舊文」一則，但仍覺得十分感動及具有啟發性。

祖孫的生死對話

有網民昨日在Facebook群姐「巴打絲打 Facebook Club」轉貼該張照片，指拍下照片的網民某日搭輕鐵期間，當經過青松站時，聽到一對祖孫的感人對話：

「公公，做咩咁多人嘅？」

「啲人去拜山囉。」

「拜山？」

「係呀，好似我哋上次去拜姨婆咁囉。」

「姨婆係咪死咗㗎啦？」

「係呀。」

「係咪唔會再返屋企㗎啦？」

「係呀。」

「咁你呢？」

「我好老㗎啦，我都就嚟死㗎啦！」

「咁邊個湊我返學呀？」

「無人湊你㗎啦，你自己返學㗎啦！」

跟住兩公孫靜靜對望咗 15 秒。

細路女突然爆喊 :「公公，你唔好死呀，你唔好死呀，嗚嗚～」

孫女不捨爆喊

網民指出，女童的哭喊聲隨即傳遍整個車廂，「由青松站一路喊到兆康站」，直至公公稱「好啦好啦，我唔死啦」，她才肯收聲。網民最後感性地稱：「傻妹，你公公點捨得死呀，佢仲要響以後，當你數學考試唔合格、升唔到第一志願嘅中學、俾朋友杯葛、俾人飛、俾老闆炒、同老公嘈交……嘅時候，好似而家咁幫你抹眼淚的。」

網民深受感動

此帖旋即獲得逾1萬人「畀Like」，不少網民表示雖然此為「舊文」，以前都曾在網上看過，但仍被祖孫二人的對話感動到，「Old news，不過對話睇咗好多次都好感人」、「雖然篇嘢係咸豐年，但睇親都不自覺淚滿(熱淚)盈眶」、「公公可否不會老」、「親情，沒有一樣東西可取代」、「無人可以決定人既生命長短，珍惜眼前人吧」。另有網民雖然質疑可能是有人「看圖作文」，但認為此帖仍有一定啟發性，希望社會上可以有多點正能量故事互相分享。