去太古坊尋好書 滋潤心靈獻愛心

閱讀有益身心，仲可以做善事！黛安知道，由太古地產、香港小童群益會和義務工作發展局攜手合辦嘅「書出愛心十元義賣」，今起一連4日喺鰂魚涌太古坊ArtisTree舉行，同場仲會有樂隊表演、專為小朋友而設嘅中英文互動講故事劇場等等，節目非常豐富！

「書出愛心十元義賣」活動嚟到第9屆，主打當然係書展。公關姊妹同黛安分享，今年活動包羅文化、藝術、音樂及親子等元素，係歷年來最豐富！為期2個月嘅書籍收集活動反應熱烈，收到超過20萬本、涵蓋20個不同類別嘅好書，全部以每本10元出售。就連無印良品都捐出1,000本全新書籍以作支持，啱晒愛書之人嚟尋寶！姊妹話，活動所籌得嘅善款會悉數捐畀香港小童群益會嘅「群益寶庫」計劃，以及義務工作發展局作為推動義工服務發展。

同場亦設有一個打卡熱點，名為「綻放‧愛」嘅巨型藝術裝置，由環保時裝設計師徐逸昇設計，並有成200位義工合力製作，旨在喚醒大家對可持續發展嘅關注。