鄭子誠初入行曾被負評 憑《真情》《音樂情人》感染港人

講起靚聲同御用奸角，大家會諗起邊個？一定非鄭子誠莫屬。明明冇參加過DJ訓練班，但就憑住磁性聲音令萬千少女為之瘋狂，仲日日等佢收工嘅幻想音樂情人；明明冇參加過TVB藝員訓練班，但就憑奸角形象深入民心，由《真情》嘅李子浩到《跳躍生命線》嘅黑面神教官，演技出神入化，被觀眾認定係無惡不作嘅奸人，喺2018年攞埋「專業演員獎」......鄭子誠成就咗電台同電視界嘅傳奇。

▼click以下link知多啲啦

{{hket:youtube id="smJnsJtLwk0"}}{{/hket:youtube}}

從未想過做DJ 一入行即被負評不斷

鄭子誠唔覺得自己有把靚聲，反而認為早期嗰陣把聲唔太穩定，星期一同星期三做嘅節目把聲都可能唔一樣，未搵到屬於自己把聲，所以諗返起以前，原來佢根本冇諗過自己可以做到DJ。多年前喺加拿大讀完書畢業之後，鄭子誠就搵咗份櫥窗設計嘅工。咁啱佢好鍾意聽歌，用啲錢儲咗好多好多黑膠，為咗幫屋中無數嘅黑膠搵地方安置，鄭子誠就毅然加入電台，等佢可以放碟。最後一擊即中，成功考入加拿大電台，即刻機會做節目，報交通消息。

由於加拿大華人少，發展唔大，鄭子誠喺1991年返港做節目。本來佢以為有得直接做幕前，原來只係做幕後，日日打文件、寫信，數龍虎榜，比死更難受，搞到好氣餒。終於去到1993年，鄭子誠重返香港電台，不過因為喺生活節奏好慢嘅加拿大住得太長時間，自己都受感染，反應慢、講嘢節奏都好慢。鄭子誠曾經主持過音樂節目，雖然時間比較夜，但曾經被聽眾話講嘢太慢；曾經主持過朝早節目，又被聽眾投訴把聲太沉，一起身就好想瞓返覺；曾經主持訪問節目，因為反應慢唔可以即刻接到，被人婉轉批評唔適合喺呢行做：「佢話我係個好好嘅聆聽者，呢個說話聽起嚟好正面，其實啫係話我由晒個聽眾講嘢，做唔到節目。」

中間鄭子誠曾經有機會自己一個主持《今夜真情》，以為擁有一切，以為踏上青雲路，點知節目做咗唔太長時間，原來因為老闆覺得節目欠缺新意，結果節目由星期一至五，cut到得返星期日，每星期5晚縮減到一晚。鄭子誠坦言嗰陣諗住自己實被人炒，感覺好似天堂跌落地獄咁。即使有一刻曾經想過離開，但對鄭子誠嚟講，踏入電台就唔會咁易放棄，所以繼續努力，加上做電台滿足好大，所以決定堅持做自己鍾意做嘅嘢。

{{hket:inline-image name="121.jpg"}}{{/hket:inline-image}}

(《晴報》獨家)

從事業低潮走出來 入TVB做奸角成名

咁啱呢個時候TVB 搵鄭子誠做《城市追擊》，被《真情》監製睇中，要飾演一個戇直嘅內地青年李子浩，之後開始愈做愈奸，做盡壞事。拍戲要同人打交對鄭子誠嚟講係有點兒辛苦，加上要好短時間回復心情，如果控制唔到差少少就會成魔。不過鄭子誠話好彩有DJ呢個角色平衡返個心態，從角色抽身搵返真正自己，先不至於成為心理變態，跌入深淵。

鄭子誠話自己係個觀察力強，鍾意睇周遭人反應嘅人，所以咩都係自學得返嚟。見到好多人迷失自己，鄭防誠就有使命感，希望帶正面訊息、價值觀美好，帶俾大家，所以一直喺TVB、電台兩邊走。然而，鄭子誠坦言分享自己嘅經驗可以，教就唔敢當，非常謙虛，唔怪之得可以得到今日嘅成就。

{{hket:inline-image name="120.jpg"}}{{/hket:inline-image}}

(《晴報》獨家)