恩物！滅蚊神器數日殺過百隻蚊 地盤男：效果好又平唔使40蚊

隨著天氣變得濕熱，蚊蟲亦開始變得活躍，令不少市民深受困擾。一名在地盤辦公室工作的男網民昨晚分享一部「滅蚊神器」，指自己放置該部座枱燈大小的神器後數天後，開蓋即見逾百隻蚊屍，成功解決了困擾多時的蚊患問題。

{{hket:inline-image name="mos160420191.jpg"}}{{/hket:inline-image}}

樓主在Facebook群組「Tai Po 大埔」發帖，指該款USB滅蚊機購自網上平台「淘寶」，他將之放在工作的地盤寫字樓內，「地盤寫字樓嘅室內嚟講，算幾好效果！又平，記得收工前要所有燈全關！」他解釋該部滅蚊機的原理，「紫外線滅蚊器能產生蚊蟲鐘意嘅光線、吸引蚊蟲，落入捕蚊氣旋中，使到蚊子有入無出，自然脫水死亡。」

他又提醒，因為人類體味的吸引力較強勁，「記得記得記得，唔好以為蚊燈無敵，佢嘅光絕對無人類體味咁吸引，所以你擺得近自己，一樣變人肉放題，所以要將蚊燈放係一個全黑無光源嘅位置收蚊，如果想瞓覺近身無蚊，最有效都係用蚊帳或者電蚊香！所以你如果之前部機唔得，可能你擺放有問題，唔關部機事！」最後，他又表明自己並非滅蚊專家，只是「開心share」。

{{hket:inline-image name="mos160420192.jpg"}}{{/hket:inline-image}}

此事引來網民熱議，不少網民留言表示對滅蚊機有興趣，「好勁咁喎」、「好想買番部！那裏買？」、「好需要」、「好似幾好用喎」。同時，亦有不少人笑言：「祖宗18代喺晒到！」、「小炒王！」、「屋企有養開爬蟲類攞嚟做飼料！」不過，亦有網民表示質疑，「呢啲電器淘寶唔好啦！香港買都係百令(零)蚊炸(咋)嘛」、「我買過一部類似款，但沒有效果，咁耐只捉過一隻」。

對此，樓主進一步留言表示，淘寶上有海量同類型號，「我買呢部唔洗(使)40蚊」。他認為不太需要計較牌子，因為效果都差不多，放置3至5天便有以上「收成」，「記住，呢款係唔會電死佢，只會吸蚊入去，所以睇收成時候會有機會飛蚊出嚟㗎！」他又提醒，使用時要遠離人及關燈，否則會沒有效用。

學者：內地電器規格與港有差異

網購流行，近年愈來愈多港人經淘寶等內地網買平價家電在港使用。但理大電機工程學系教授鄭家偉早前接受《晴報》訪問時提醒，內地電器規格與港有差異，長用轉插器（Adapter）供電，隨時有着火危機。因此，大家要慎選、慎用，注意安全。