首度參加太平清醮 熊本熊送「平安」

每年長洲太平清醮都好熱鬧，黛安知道今年日本嘅名「熊」都話要玩埋一份！

日本人氣吉祥物幸福部長熊本熊，將首次參加長洲太平清醮，包括節慶期間喺島上多個位置設置打卡位，仲會率先喺今個星期日（21號）推出幸福平安包和2019限量紀念品，為香港市民祈福！

熊本熊向來予人治癒嘅感覺，襯晒用平安為主題嘅太平清醮。黛安聽公關姊妹講，今次佢哋crossover推出一盒4個嘅平安包禮盒，售價99元，每盒有齊黑芝麻、紅豆、蓮蓉和麻蓉4種口味，又傳統又夠晒幸福！另外仲準備一系列2019限量特別版紀念品，好似T恤、毛巾、鎖匙扣等，畀大家可以同部長一齊參與慶典之外，亦可以留下美好回憶。仲等？熊本熊粉絲記住由今個星期日（21號）開始，至5月13號期間，去熊本熊專門店、長洲康蘭餅店等地掃貨啦，今個月30號起指定一田百貨都有售啊！