復活節遊叮叮河兼購物 文創電車化身派對空間

黛安喺港島返工，所以好鍾意搭叮叮，舊年文創電車Circus Tram推出嘅時候，都經常去遊叮叮河。最近收到風，知道Circus Tram又有新搞作，仲好特別！

聽公關姊妹話，文創電車Circus Tram喺復活節期間，派對精品公司Made of Paper會舉辦《Made of Paper x Circus Tram POP-UP-STORE︰IMAGINATION PARTY》，係香港電車115年歷史以來，首次將電車變成流動商店！

電車Circus Tram會化身成別致嘅派對空間，市民喺車上面3間主題陳列室，可以一邊遊叮叮河，一邊挑選派對精品，聽講產品好多元化，無論大人細路都一定揀得啱。

電車「粉絲」要留意啦，今個星期六（20日）和星期日（21日），電車Circus Tram會穿梭上環至銅鑼灣鬧市，市民即日起就可以喺網上登記，上車參觀和掃貨，由下午2時半至7時，每節時間為30分鐘，上車地方包括上環、金鐘和銅鑼灣。即場購物仲有8折優惠，每位參加者可免費獲贈復活蛋DIY製作套裝1份。不過要提醒大家，付款只接受現金。網上登記名額有限，先到先得，快啲去報名啦！