不滿飛機前客挨後放上網公審 港男：你舒服時後面好辛苦

搭飛機時應否將椅背挨後，近年已成為社會討論議題之一。日前，一名男子乘搭香港航空客機，由日本沖繩飛返香港期間，因前座女乘客挨得太盡而引發口角，對方出手阻止拍攝，疑致其Apple手機的耳機失靈。事主拍下涉事女乘客的容貌放上網公審，並詢問一眾網民應否報警，引來網民熱議。

桌上膠樽被夾住

樓主在Facebook群組「馬鞍山之友 MOSers (Since 2014)」發帖，指客機座位本身比較窄，未料坐在前面的內地女子突然將椅背挨到最後，除了夾住放在桌上的膠樽外，其他物件亦推跌落地，「因為唔夠位，就推一推佢張櫈，結果佢故意挨返後，所以我執完上返嚟又唔夠位，我再推一推」。對方隨即發難，以普通話表示：「先生，你可以不要打擾我休息嗎？」

女乘客：我有權利可以挨後

於是，樓主及其同行家人解釋「個位好窄」，該名女乘客反駁「那你挨後就好啊」，「我勸佢話『咁我未(咪)會影響到後面囉，做人唔可以咁冇公德心㗎嘛，係咪先』，點知佢潑婦罵街，唔講道理咁話『你所謂嘅公德心係邊個規範㗎？我有權利可以挨後㗎！』見佢咁激動，小弟即刻 Call職員啦。」此時，對方丈夫勸交無果，「小弟即刻影佢相以備不時之需，佢即刻打走小弟部手機同耳機，此時職員到達，即刻阻止佢，叫佢唔可以郁手。」

耳機疑被啪斷電線失靈

女乘客十分生氣，由於以為樓主兩次推椅背的動作是用腳踢，遂向空姐表示：「佢踢我又唔見你理？」；樓主趁她說話時拍下其容貌，「結果佢又打走小弟個手機」，最終他獲空姐安排調位了事。然而，樓主隨後發現其Apple有線耳機失靈，可能與「啪斷咗入面啲電線」有關，未知應否報警。樓主最後在文中表示：「其實小弟唔係話唔畀佢挨後，但係挨後之前唔該講聲，或者最起碼唔好落得咁快，同埋唔好挨咁落吖係咪。飛機座位咁迫，你挨後挨到盡，你舒服時後面嗰個其實好辛苦㗎！」

網民意見兩極

網民對此意見兩極，有人支持樓主，認為該名女乘客有問題，「佢損壞你耳機可以報警」、「郁手就一定錯，俾我一定追究到底」、「咩叫『己所不欲，勿施於人』唔洗(使)人教呀？」、「唉(挨)咁後好自私，一啲家教都無」、「成程機踢佢椅背，睇下邊個辛苦」。

不過，亦有不少網民認為樓主的做法不妥，「吓……今時今日搭飛機將張櫈挨後原來都會比人鬧」、「調反轉，你想人地移返前啲，你唔可以好聲好氣同人講咩？」、「出post就以為自己啱晒？坐得經濟客位預咗有人挨後張櫈㗎啦，你自己夠推人啦，人地唔鬧得你㗎？」、「唔挨係人情！挨就係道理！架機係咁樣設計，都冇辦法！」、「人哋真係有權挨前挨後，或只要張櫈可以調教嘅角度，佢的確冇道德問題，反觀樓主影人哋個樣上嚟呢就真係有道德問題啦」。