港男有案底失業難養家終獲聘 暖心HR：要畀機會人改過

浪子回頭金不換，亦需社會大眾接納方可重新出發。一名因醉駕而留案底的男子雖希望改過自新，卻長期失業無法養妻活兒。他近日與獵頭公司職員見面時，提起生活上所面對困難及委屈時忍不住落淚。所幸對方盡力幫他介紹工作，最後更獲暖心人事部職員安排見工並獲聘。

暖心HR：要畀機會人改過

Facebook專頁「辦公室日報x聶瞳」的版主在獵頭公司工作，他日前在專頁分享該則感人故事，指有做廚具的客人近日要請主管，於是他便介紹一名符合經驗要求的求職者，對方亦覺適合。當與該公司人事部職員通電話安排見工時間之際，聶瞳坦白道出該名求職者2年前因醉駕而留案底，「雖然冇造成傷亡，不過佢話已經知錯，而且係錯得好緊要，佢同我講已經戒酒，停完牌亦冇再揸車，因為答應咗老婆同個囡會改過。」正當他打算進一步補充時，想不到對方爽快地稱：「都唔緊要嘅，同份工唔關事，要畀人有機會改過，公平啲。」最後，該公司更聘用了該名求職者。

求職者流下男兒淚

聶瞳在文中憶述，其實較早前他與該名求職者見面時，對方講到生活上所面對的困難時忍不住流下男兒淚，「佢喊，係因為留案底之後搵工搵咗好耐，心入面有兩種委屈，一種係灰心，失望，同埋不斷遭受白眼；另一種委屈就係經濟出現問題，雖然佢老婆有工作，不過始終有小朋友，衣食住行書簿費樣樣都係錢，生活壓力好大。」他直言自己當時「嚇親」，但由得他盡情發洩，「因為返到屋企未必可以對住老婆仔女去釋放呢種情緒，不過我記得佢喊個樣，完全表達出『日子好難捱』呢5個字。」

求職者：我捱得過，其他人一樣得

他又指，每個人都有自己的難處，「有案底搵工難，冇案底搵工亦唔代表容易，有好多痛苦同傷心係表面睇唔出，著到身光頸靚但匿埋捱麵包大有人在，最緊要唔好諗埋一邊，甜的吃，苦的也吃，好景不常在，但困境都唔會冇盡頭。」最後，他感謝該名求職者願意分享自己的故事，「佢話自己都捱得過，其他人一樣得，特別送畀搵工處處碰釘嘅朋友。」

網民：咁通情達理好難得

對此，不少網民深受感動，「佢承認當年嘅錯誤，亦勇於面對，好應該比一個機會佢」、「咁通情達理嘅HR和公司今時今日好難搵喇，真係要鼓勵下。so positive！」、「多謝你，你幫到嘅唔係1個candidate（求職者），而係1個家庭」、「你和那位客人真係好有心」。同時，亦有網民表示：「好正面的個案分享，學到兩樣嘢：當你是掌權者的時候，要俾機會一些錯而能改的人士；第二就係盡量唔好行差踏錯，因為好多時候恨錯難返。」